బ్యాటరీలు వేడెక్కడమే కారణమా?
- మాదాపూర్‌లోని యూనిస్ట్రింగ్ టెక్ సొల్యూషన్స్‌లో చెలరేగిన మంటలు
- మూడు అగ్నిమాపక వాహనాలతో మంటలు అదుపులోకి.. తప్పిన ప్రాణనష్టం
- విద్యుత్ సరఫరా నిలిచిపోవడంతో కూలింగ్ వ్యవస్థ ప్రభావితమైందని అనుమానం
సామాన్యుడి అస్త్రం / మాదాపూర్ : యాంటీ డ్రోన్ వ్యవస్థలకు సంబంధించిన అత్యాధునిక పరికరాలను అభివృద్ధి చేసే యూనిస్ట్రింగ్ టెక్ సొల్యూషన్స్ సంస్థలో ఆదివారం సాయంత్రం అగ్నిప్రమాదం చోటుచేసుకుంది. సాయంత్రం 5 గంటల సమయంలో సంస్థ ప్రాంగణంలో ఒక్కసారిగా మంటలు చెలరేగాయి. సమాచారం అందుకున్న అగ్నిమాపక సిబ్బంది మూడు ఫైరింజన్లతో సంఘటనా స్థలానికి చేరుకుని మంటలను అదుపులోకి తీసుకొచ్చారు. ఈ ప్రమాదంలో ఎలాంటి ప్రాణనష్టం జరగలేదని మాదాపూర్ పోలీసులు వెల్లడించారు. అయితే ఆస్తినష్టం ఎంత జరిగిందనే విషయంపై ఇంకా స్పష్టత రాలేదు.
విద్యుత్ సరఫరా నిలిచిపోవడమే కారణమా?
అగ్నిప్రమాదానికి విద్యుత్ సరఫరాలో అంతరాయమే కారణమై ఉండొచ్చన్న అనుమానాలు వ్యక్తమవుతున్నాయి. ఆదివారం ట్రాన్స్‌ఫార్మర్ మరమ్మతుల నేపథ్యంలో విద్యుత్ సరఫరాను నిలిపివేసినట్లు పోలీసులు తెలిపారు. ఈ కారణంగా సంస్థలోని పరికరాలకు సంబంధించిన కూలింగ్ వ్యవస్థ పనితీరు ప్రభావితమై, బ్యాటరీలు అధికంగా వేడెక్కి మంటలు చెలరేగి ఉండవచ్చని ప్రాథమికంగా అనుమానిస్తున్నారు. అయితే బ్యాటరీల వల్లే అగ్నిప్రమాదం జరిగిందని ఇప్పుడే నిర్ధారించలేమని, సమగ్ర పరిశీలన తర్వాతే అసలు కారణం వెల్లడవుతుందని పోలీసులు పేర్కొన్నారు.
దర్యాప్తు తర్వాతే అసలు కారణంపై స్పష్టత!
రక్షణ రంగానికి సంబంధించిన యాంటీ డ్రోన్ సాంకేతిక పరిజ్ఞానం, ఎలక్ట్రానిక్ పరికరాల అభివృద్ధిలో పనిచేస్తున్న సంస్థలో ఈ ప్రమాదం జరగడం ప్రాధాన్యం సంతరించుకుంది. ప్రమాదంలో ఎలాంటి పరికరాలు దెబ్బతిన్నాయి? బ్యాటరీలకే మంటలు పరిమితమయ్యాయా? విద్యుత్ అంతరాయం సమయంలో కూలింగ్ వ్యవస్థకు ప్రత్యామ్నాయ ఏర్పాట్లు ఉన్నాయా? అనే అంశాలపై స్పష్టత రావాల్సి ఉంది. అగ్నిప్రమాదానికి గల కారణాలు, ఆస్తినష్టం వివరాలు పూర్తిస్థాయి తనిఖీ అనంతరం వెల్లడయ్యే అవకాశముంది. ఈ మేరకు మాదాపూర్ పోలీస్ స్టేషన్ ఎస్‌హెచ్‌వో ప్రమాద వివరాలను తెలియజేశారు.
