‘దసరా’, ‘ది గర్ల్‌ఫ్రెండ్’ సినిమాలతో తెలుగు ప్రేక్షకులకు దగ్గరైన దీక్షిత్ శెట్టి హీరోగా నటిస్తున్న పీరియడ్ క్రైమ్ డ్రామా 'KJQ' (కింగ్ – జాకీ – క్వీన్). ఇందులో 'మార్కో', 'కె - ర్యాంప్' ఫేమ్ యుక్తి తరేజా హీరోయిన్ గా నటిస్తోంది. ఈ సినిమాతో డైరెక్టర్ శ్రీకాంత్ ఓదెల సోదరుడు శశి యాక్టర్ గా పరిచయం కాబోతున్నాడు. ఇప్పటికే చిత్రీకరణ పూర్తి చేసుకున్న ఈ చిత్రం రిలీజుకు రెడీ అయింది.
'KJQ' (కింగ్ – జాకీ – క్వీన్) చిత్రానికి కిరణ్ కుమార్ (కె.కె) దర్శకత్వం వహించారు. ఈ సినిమాపై ఆయన ఎన్నో ఆశలు పెట్టుకున్నారు. కానీ మూవీ రిలీజ్ అవ్వకముందే ఈ లోకాన్ని విడిచి వెళ్లిపోయారు. గతేడాది డిసెంబర్ లో ఆయన కన్నుమూశారు. దీంతో ఇదే ఆయన కెరీర్ లో ఆఖరి చిత్రంగా నిలిచిపోనుంది. కె.కె మరణించిన దాదాపు ఎనిమిది నెలల తర్వాత సినిమా విడుదలకు సిద్ధమైంది. ఆగస్టు 7న థియేటర్లలో గ్రాండ్ గా రిలీజ్ కానుంది.
దర్శకుడు మణిరత్నం వద్ద పలు సినిమాలకు అసిస్టెంట్‌గా పనిచేసారు కిరణ్ కుమార్. అతనిలోని ప్రతిభని గుర్తించిన అక్కినేని నాగార్జున.. అన్నపూర్ణ స్టూడియోస్ నిర్మించిన సీరియల్స్ కి వర్క్ చేసే అవకాశం కల్పించారు. ఆ తర్వాత ఆయన నిర్మాణంలోనే 2010లో 'కేడి' చిత్రంతో దర్శకుడిగా ఇండస్ట్రీకి పరిచయం చేశారు. కిరణ్ తన స్టైలిష్ మేకింగ్‌తో అందరి దృష్టిని ఆకర్షించినప్పటికీ, సినిమా ప్లాప్ అవ్వడంతో ఆయనకు పెద్దగా ఆఫర్స్ రాలేదు. దాంతో మణిరత్నం దగ్గర కొన్ని సినిమాలకు సహాయ దర్శకుడిగా చేశారు. కేకే చాలా గ్యాప్ తర్వాత 'KJQ' సినిమాకి దర్శకత్వం వహించారు.
1990ల నాటి నేపథ్యంలో సాగే కథతో 'KJQ' (కింగ్ – జాకీ – క్వీన్) రూపొందుతోంది. దర్శకుడు KK ఎమోషన్స్, సంఘర్షణలు, ఆసక్తికరమైన సన్నివేశాల కలయికతో ఈ పీరియడ్ క్రైమ్ డ్రామాను తెరకెక్కించాలని చిత్ర బృందం చెబుతోంది. ఈసారి కచ్చితంగా హిట్టు కొట్టి స్ట్రాంగ్ కంబ్యాక్ ఇవ్వాలని కేకే చాలా కష్టపడ్డారు. గతేడాది ఈ మూవీ కోసం నిర్వహించిన ప్రమోషనల్ ఈవెంట్ లోనూ ధీమా వ్యక్తం చేశారు. కానీ అంతలోనే తిరిగిరాని లోకాలకు వెళ్లిపోయారు. కిరణ్ కుమార్ క్రియేటివిటీ, సినిమా పట్ల ఆయనకున్న అంకితభావానికి ఇది ఒక నివాళిగా 'KJQ' నిలుస్తుందని మేకర్స్ చెబుతున్నారు.
ఇప్పటికే విడుదలైన 'KJQ' టైటిల్ టీజర్, థియేట్రికల్ ట్రైలర్‌ జనాల్లో ఆసక్తిని కలిగించింది. ఫ్రెండ్ షిప్ డే స్పెషల్ గా తాజాగా సినిమాలోని 'నువ్వే తోపు' అనే పాటను లాంచ్ చేశారు. SLV సినిమాస్ బ్యానర్ పై నిర్మాత సుధాకర్ చెరుకూరి ఈ చిత్రాన్ని నిర్మిస్తున్నారు. పూర్ణచంద్ర తేజస్వి సంగీతం సమకూర్చగా.. నాగేశ్ బనెల్ సినిమాటోగ్రఫీ నిర్వహించారు. శ్రవణ్ కటికనేని ఎడిటర్ గా, శ్రీకాంత్ రామిశెట్టి ప్రొడక్షన్ డిజైనర్ గా వర్క్ చేశారు. KK మరణాంతరం రిలీజ్ కాబోతున్న ఈ సినిమా ఎలాంటి విజయాన్ని అందుకుంటుందో చూడాలి.
