- రేషన్ బియ్యాన్ని అక్రమంగా రీసైక్లింగ్ చేస్తున్నారనే సమాచారం
- తెలంగాణ సివిల్ సప్లైస్ విజిలెన్స్ ఎస్పీ ఆధ్వర్యంలో తనిఖీలు
- మిల్లులోని బియ్యం నిల్వలు, రికార్డులపై అధికారుల ఆరా
సామాన్యుడి అస్త్రం / రాయపోల్ : పేదల కడుపు నింపాల్సిన రేషన్ బియ్యం అక్రమార్కుల చేతుల్లోకి చేరుతోందా? ప్రభుత్వ పంపిణీ వ్యవస్థ ద్వారా ప్రజలకు అందాల్సిన బియ్యాన్ని రైస్మిల్లులో రీసైక్లింగ్ చేస్తున్నారా? అనే అనుమానాలు సిద్దిపేట జిల్లా దుబ్బాక నియోజకవర్గంలో కలకలం రేపుతున్నాయి.
రాయపోల్ మండలం రామారం గ్రామంలోని ఓ రైస్మిల్లులో రేషన్ బియ్యాన్ని అక్రమంగా రీసైక్లింగ్ చేస్తున్నట్లు సివిల్ సప్లైస్ విజిలెన్స్ అధికారులకు సమాచారం అందింది. దీంతో తెలంగాణ సివిల్ సప్లైస్ విజిలెన్స్ ఎస్పీ ఆధ్వర్యంలో అధికారులు మిల్లుపై దాడులు నిర్వహించి విస్తృతంగా తనిఖీలు చేపట్టారు.
మిల్లులో నిల్వ చేసిన బియ్యం ఎక్కడి నుంచి వచ్చింది? దానికి సంబంధించిన కొనుగోలు, రవాణా పత్రాలు ఉన్నాయా? నిల్వలకు, రికార్డులకు మధ్య తేడాలు ఉన్నాయా? అనే అంశాలపై అధికారులు ఆరా తీస్తున్నట్లు సమాచారం. రేషన్ బియ్యాన్ని సేకరించి, దానిని పాలిష్ చేసి సాధారణ బియ్యంగా మార్కెట్లో విక్రయించే ప్రయత్నం జరిగిందా? అనే కోణంలోనూ పరిశీలన జరుగుతున్నట్లు తెలుస్తోంది.
ప్రజా పంపిణీ వ్యవస్థకు చెందిన బియ్యాన్ని అక్రమంగా మళ్లించినట్లు విచారణలో తేలితే, దీనివెనుక ఉన్న అసలు సూత్రధారులు ఎవరో బయటపెట్టాల్సిన అవసరం ఉంది. బియ్యం మిల్లుకు ఎలా చేరింది? మధ్యవర్తుల పాత్ర ఉందా? సంబంధిత అధికారుల పర్యవేక్షణ ఎందుకు విఫలమైంది? అనే ప్రశ్నలకు సమాధానాలు రావాల్సి ఉంది.
ఈ తనిఖీల్లో ఎంత బియ్యం గుర్తించారు? ఏవైనా నిల్వలను స్వాధీనం చేసుకున్నారా? మిల్లు నిర్వాహకులపై కేసు నమోదు చేశారా? అనే వివరాలను అధికారులు అధికారికంగా వెల్లడించాల్సి ఉంది. విచారణ పూర్తయిన తరువాతే అక్రమ రీసైక్లింగ్కు సంబంధించిన పూర్తి వాస్తవాలు వెలుగులోకి వచ్చే అవకాశం ఉంది.
