అనుమతి ఒక్కటే.. నిర్మాణాలు రెండా? ప్రభుత్వ భూమి వివాదంలో మున్సిపల్ మౌనం!

రెండో భవనానికి ప్రత్యేక అనుమతి ఉందా, లేకపోతే ఒకే అనుమతిని ఆధారంగా చేసుకుని అదనపు నిర్మాణం సాగుతుంటే ఇప్పటివరకు చర్య ఎందుకు తీసుకోలేదో చెప్పాలి. ఫిర్యాదులున్నా, తెలిసినా కదలని పట్టణ ప్రణాళిక అధికారులు “మాకు తెలియదు” అని చెప్పి తప్పించుకునే విషయం కూడా కాదు. నెలలుగా ఈ వ్యవహారాన్ని పట్టణ ప్రణాళిక అధికారుల దృష్టికి తీసుకెళ్తున్నామని ఫిర్యాదుదారులు చెబుతున్నారు. పలుమార్లు కార్యాలయాలకు వెళ్లి వివరించినా చూస్తాం.. పత్రాలు తెప్పిస్తాం.. సంబంధిత వారిని పిలుస్తాం అన్న సమాధానాలే వస్తున్నాయని ఆరోపిస్తున్నారు.

స్థలానికి వెళ్లి కొలిచారా, ఆమోదిత నిర్మాణాన్ని క్షేత్రంలోని నిర్మాణాలతో పోల్చారా, రెండో భవనానికి అనుమతి ఉందో లేదో తేల్చారా, రెవెన్యూ శాఖతో భూమి హద్దులపై సమన్వయం చేశారా, ఇవేవీ ప్రజల ముందుకు రాకపోతే అధికారుల నిర్లక్ష్యంపై అనుమానాలు మరింత బలపడటంతో పాటు, ఈ నిర్లక్ష్యం వెనుక ఇతర ప్రయోజనాలేమైనా ఉన్నాయా అన్న ఆరోపణలు కూడా స్థానికుల నుంచి వినిపిస్తున్నాయి. దీనికి సర్కిల్‌–48 పట్టణ ప్రణాళిక విభాగం సమాధానం చెప్పాలని స్థానికులు డిమాండ్ చేస్తున్నారు.

ఇక్కడ మరో కీలకమైన అంశం ఉంది. ఇదే ప్రాంతంలోని మియాపూర్‌ సర్వే నం.69/1లోని 19 ఎకరాల 14 గుంటల భూమి ప్రభుత్వ భూమేనని రెవెన్యూ శాఖ కోర్టులో వాదించింది. 22-ఏ నిషేధిత ఆస్తుల అంశాన్ని కూడా ప్రస్తావించింది. అలాంటి భూమికి ఆనుకుని ఉన్న స్థలంలో నిర్మాణ అనుమతి ఇస్తున్నప్పుడు మున్సిపల్ శాఖ సాధారణ ఫైల్‌లా వ్యవహరించడమేంటన్న ప్రశ్న తలెత్తుతోంది. అనుమతి పత్రంలోనే నిషేధిత ఆస్తుల పరిశీలన రిజిస్టర్‌కు సంబంధించిన నమోదు కనిపిస్తున్న పరిస్థితిలో, అసలు ఏం పరిశీలించారు, ఏ రెవెన్యూ రికార్డులు చూశారు, సర్వే నం.224 హద్దులను ఎవరు నిర్ధారించారు, మియాపూర్‌ 69/1తో ఓవర్ల్యాప్‌ ఉందా లేదా ఎవరు తేల్చారు. ఇవి సాధారణ ప్రశ్నలు కావు. ప్రభుత్వ భూమి పరిరక్షణకు సంబంధించిన ప్రశ్నలు.

సర్కిల్‌ స్థాయిలో ఇంతటి వివాదం కొనసాగుతుంటే డిప్యూటీ కమిషనర్‌ ఇది పట్టణ ప్రణాళిక శాఖ విషయం అని పక్కకు తప్పుకోవడం ఎంతవరకు సమంజసం, అన్ని శాఖల పనిని డీసీ స్వయంగా చేయాల్సిన అవసరం లేకపోవచ్చు. కానీ తన పరిధిలో ప్రభుత్వ భూమి వివాదం, నిర్మాణ అనుమతులు, కోర్టు కేసులు, వరుస ఫిర్యాదులు ఉన్నప్పుడు సంబంధిత అధికారులను పిలిపించి నివేదిక కోరాల్సిన బాధ్యత మాత్రం తప్పదు. అదే విధంగా అసిస్టెంట్ సిటీ ప్లానర్‌ స్థాయి అధికారి ముందు నెలలుగా ఫిర్యాదు ఉన్నా, క్షేత్రస్థాయిలో స్పష్టమైన చర్య కనిపించకపోతే అది సాధారణ ఆలస్యం అని కొట్టిపారేయలేం. నిర్మాణం పూర్తయిన తర్వాత చర్య తీసుకుంటామంటే ప్రభుత్వానికి వచ్చే ప్రయోజనం ఏమిటి? అప్పటికే ఫ్లాట్లు అమ్ముడై మూడోపక్ష హక్కులు ఏర్పడితే బాధ్యత ఎవరిది, ప్రభుత్వ భూమి అయితే ఒక్క గజం కూడా చేజారకుండా కాపాడాల్సింది అధికారులే. కానీ ఒక శాఖ ప్రభుత్వ భూమి అంటుంటే, మరో శాఖ అనుమతులు ఇచ్చి, ఫిర్యాదులు వచ్చిన తర్వాత కూడా నెలల తరబడి చూస్తూ ఉండటం పరిపాలనా నిర్లక్ష్యం కాక మరేమిటి. ఇప్పటికైనా సర్కిల్‌–48 డిప్యూటీ కమిషనర్‌, పట్టణ ప్రణాళిక అసిస్టెంట్ సిటీ ప్లానర్‌ సంయుక్తంగా స్థలాన్ని పరిశీలించి, ఆమోదిత నిర్మాణ పటం, స్థల పరిశీలన నివేదిక, రెండో నిర్మాణానికి సంబంధించిన అనుమతి వివరాలను ప్రజల ముందుంచాలి.