పటేల్ 151వ జయంతి.. సైబరాబాద్ పోలీసుల జాతీయ ఐక్యతా ప్రతిజ్ఞ!

సామాన్యుడి అస్త్రం / సైబరాబాద్ బ్యూరో : దేశం ఒక్కటిగా నిలవాలంటే ప్రజల మధ్య ఐక్యత ఉండాలి. ఆ ఐక్యతను కాపాడటంలో ప్రతి పౌరుడికీ బాధ్యత ఉంది. ఇదే సందేశాన్ని చాటుతూ సైబరాబాద్ పోలీసులు జాతీయ ఐక్యతా దినోత్సవాన్ని ఘనంగా నిర్వహించారు. భారత ఉక్కు మనిషి సర్దార్ వల్లభభాయ్ పటేల్ 151వ జయంతిని పురస్కరించుకుని శనివారం పోలీసు అధికారులు, సిబ్బంది జాతీయ ఐక్యతా ప్రతిజ్ఞ చేశారు. సైబరాబాద్ అడ్మిన్ డీసీపీ అన్నపూర్ణ ఐపీఎస్ ఆధ్వర్యంలో ఈ కార్యక్రమం జరిగింది.

ఈ సందర్భంగా డీసీపీ అన్నపూర్ణ మాట్లాడుతూ దేశ స్వాతంత్ర్య పోరాటంలో, స్వాతంత్ర్యం తర్వాత భారతదేశాన్ని ఏకతాటిపై నిలపడంలో సర్దార్ వల్లభభాయ్ పటేల్ అందించిన సేవలు మరువలేనివని కొనియాడారు. స్వాతంత్ర్యం వచ్చిన సమయంలో దేశంలోని సంస్థానాలను భారత యూనియన్‌లో విలీనం చేయడం అంత సులభమైన విషయం కాదన్నారు. అప్పటి పరిస్థితుల్లో పటేల్ చూపిన నాయకత్వం, పట్టుదల దేశ సమగ్రతకు బలమైన పునాది వేశాయని పేర్కొన్నారు. 562 సంస్థానాలను భారత యూనియన్‌లో విలీనం చేయడంలో ఆయన కీలక పాత్ర పోషించారని వివరించారు.

దేశాన్ని కాపాడటమంటే కేవలం సరిహద్దులను రక్షించడమే కాదని, ప్రజల మధ్య సామరస్యాన్ని పెంపొందించడం కూడా అంతే ముఖ్యమని అన్నపూర్ణ పేర్కొన్నారు. శాంతిభద్రతలను కాపాడే పోలీసులకు ఈ బాధ్యత మరింత ఎక్కువగా ఉంటుందన్నారు. విధి నిర్వహణలో క్రమశిక్షణ, అంకితభావంతో పాటు దేశ సమగ్రత పట్ల నిబద్ధత అవసరమని సూచించారు.

పటేల్ జీవితాన్ని ఆదర్శంగా తీసుకుని ప్రతి పోలీసు అధికారి, సిబ్బంది ప్రజాసేవలో ముందుండాలని పిలుపునిచ్చారు. కులాలు, మతాలు, ప్రాంతాలకు అతీతంగా అందరూ కలిసికట్టుగా ఉన్నప్పుడే దేశం మరింత బలపడుతుందని పేర్కొన్నారు. భావితరాలకు జాతీయ ఐక్యత విలువను తెలియజేయాల్సిన బాధ్యత ప్రతి ఒక్కరిపైనా ఉందన్నారు.

జాతీయ ఐక్యతా దినోత్సవంలో భాగంగా పోలీసు అధికారులు, సిబ్బంది దేశ ఐక్యత, సమగ్రత, భద్రతను కాపాడేందుకు కట్టుబడి ఉంటామని ప్రతిజ్ఞ చేశారు.

ఈ కార్యక్రమంలో హెడ్‌క్వార్టర్స్ డీసీపీ సంజీవ్, సూపరింటెండెంట్లు మల్లికార్జున్, యజ్దానీ, హనుమా, రమాదేవి, ఎస్టేట్ ఆఫీసర్ ఆర్‌ఐ హిమాకర్, అడ్మిన్ ఆర్‌ఐ రామారావు, వెల్ఫేర్ ఆర్‌ఐ నాగరాజుతో పాటు ఇతర పోలీసు అధికారులు, సిబ్బంది పాల్గొన్నారు.

పటేల్ జయంతి సందర్భంగా నిర్వహించిన ఈ కార్యక్రమం దేశ సమైక్యతను గుర్తుచేయడంతో పాటు ప్రజాసేవలో పోలీసుల బాధ్యతను మరోసారి చాటింది.