హైదరాబాద్లో ఆదివారం ఓ మైనర్ బాలుడు లైసెన్స్ లేకుండా కారు నడిపి బీభత్సం సృష్టించాడు. బోరబండ ప్రాంతంలో మారుతి బాలెనో కారుపై నియంత్రణ కోల్పోయి, మొదట పార్కింగ్ చేసి ఉన్న ఏడు ద్విచక్రవాహనాలను ఢీకొట్టాడు. అనంతరం చర్చికి వెళుతున్న ఇద్దరు సోదరులు ప్రయాణిస్తున్న బైక్పైకి కారును దూసుకెళ్లడంతో వారికి తీవ్ర గాయాలయ్యాయి.
ఈ ప్రమాదమంతా అక్కడి సీసీటీవీ కెమెరాల్లో రికార్డయ్యింది. కారు వేగంగా వచ్చి ఢీకొట్టడంతో బైక్పై ఉన్న రాజ్ కుమార్ (60), ప్రభాకర్ (55) అనే సోదరులు కిందపడిపోయారు. ఈ ఘటనలో ప్రభాకర్కు స్వల్ప గాయాలు కాగా, రాజ్ కుమార్ కారు కింద చిక్కుకుపోయారు. ఇది గమనించిన స్థానికులు వెంటనే అక్కడికి పరుగెత్తుకొచ్చి, కారును పైకి లేపి అతడిని బయటకు తీశారు. తీవ్రంగా గాయపడిన ఇద్దరినీ వేర్వేరు ప్రైవేట్ ఆసుపత్రులకు తరలించారు.
ప్రమాదం జరిగిన తర్వాత ఆ 17 ఏళ్ల బాలుడు అక్కడి నుంచి పారిపోయేందుకు ప్రయత్నించాడు. అయితే, స్థానికులు అతడిని వెంబడించి పట్టుకుని పోలీసులకు అప్పగించారు. ఈ క్రమంలో స్థానికులు బాలుడిపై దాడి చేసినట్టు కూడా తెలుస్తోంది. కారు వాషింగ్ చేసిన తర్వాత తాళాలు అందులోనే ఉండటంతో, బాలుడు సరదాగా డ్రైవింగ్ కోసం కారును బయటకు తీసినట్లు పోలీసుల ప్రాథమిక విచారణలో తేలింది.
ఈ ఘటనపై మధురానగర్ పోలీసులు కేసు నమోదు చేసి, దర్యాప్తు కొనసాగిస్తున్నారు.
బోరబండలో కారు బీభత్సం.. మైనర్ బాలుడి డ్రైవింగ్.. ఇద్దరికి తీవ్ర గాయాలు
