ట్రాఫిక్ జామ్‌కు చెక్ పెట్టండి!.. ఆర్సీపురం–కేపీహెచ్‌బీలో జేసీపీ క్షేత్రస్థాయి తనిఖీలు

సామాన్యుడి అస్త్రం / సైబరాబాద్‌:

నిత్యం వాహనాల రద్దీతో సతమతమవుతున్న ఆర్సీపురం, లింగంపల్లి, కేపీహెచ్‌బీ ప్రాంతాల్లో ట్రాఫిక్ సమస్యలకు శాశ్వత పరిష్కారం చూపాలని సైబరాబాద్ ట్రాఫిక్ సంయుక్త పోలీసు కమిషనర్ సన్‌ప్రీత్ సింగ్, ఐపీఎస్ అధికారులను ఆదేశించారు. ట్రాఫిక్ నియంత్రణ కాగితాలకే పరిమితం కాకుండా క్షేత్రస్థాయిలో ఫలితం కనిపించాలని స్పష్టం చేశారు.

సన్‌ప్రీత్ సింగ్ సెప్టెంబర్ 11న ఉదయం సుమారు 11:30 గంటలకు ఆర్సీపురం ట్రాఫిక్ పోలీస్ స్టేషన్‌ను సందర్శించారు. స్టేషన్ పనితీరు, ట్రాఫిక్ నియంత్రణ చర్యలు, నిబంధనల అమలు తీరును సమగ్రంగా సమీక్షించారు. ఈ సందర్భంగా ట్రాఫిక్–2 డీసీపీ శేషాద్రిని రెడ్డి, ఐపీఎస్, అదనపు డీసీపీ ఎ.వీరన్న, ఆర్సీపురం ట్రాఫిక్ పోలీస్ స్టేషన్ ఎస్‌హెచ్‌వోతోపాటు ఇతర పోలీసు సిబ్బంది ఆయన వెంట ఉన్నారు.

ట్రాఫిక్ పోలీసు సిబ్బంది రోజువారీగా నిర్వహిస్తున్న విధులు, ప్రధాన కూడళ్లు, రద్దీ ఎక్కువగా ఉండే ప్రాంతాల్లో చేపడుతున్న నియంత్రణ చర్యల గురించి జేసీపీ అడిగి తెలుసుకున్నారు. 2025, 2026 సంవత్సరాలకు సంబంధించిన ట్రాఫిక్ నిబంధనల అమలు గణాంకాలను పరిశీలించి, రెండు సంవత్సరాల పనితీరును పోల్చి చూశారు. నిబంధనల ఉల్లంఘనలను నియంత్రించడంతోపాటు రహదారి భద్రతను మరింత మెరుగుపరిచేందుకు అవసరమైన చర్యలు తీసుకోవాలని సూచించారు.

ఆర్సీపురం పరిధిలో కొనసాగుతున్న రహదారి అభివృద్ధి పనులపై జేసీపీ ప్రత్యేకంగా దృష్టి సారించారు. లింగంపల్లి రైల్వే అండర్ బ్రిడ్జి, ఫ్లైఓవర్ పనులతోపాటు ఎన్‌హెచ్‌–65 రహదారి అభివృద్ధి పనుల పురోగతిని సమీక్షించారు. నిర్మాణ పనులు జరిగే ప్రాంతాల్లో ట్రాఫిక్‌కు ఆటంకం ఏర్పడకుండా ముందస్తు ప్రణాళికతో వ్యవహరించాలని అధికారులను ఆదేశించారు.

ప్రత్యామ్నాయ మార్గాలు, హెచ్చరిక బోర్డులు, బారికేడ్ల ఏర్పాటు విషయంలో నిర్లక్ష్యం వహించవద్దని సూచించారు. పనుల కారణంగా వాహనదారులు గంటల తరబడి రోడ్లపై నిలిచిపోకుండా సంబంధిత విభాగాలతో సమన్వయం చేసుకొని ట్రాఫిక్‌ను క్రమబద్ధీకరించాలని స్పష్టం చేశారు.

అనంతరం లింగంపల్లి రైల్వేస్టేషన్‌ను సందర్శించిన జేసీపీ, స్టేషన్ పరిసరాల్లో వాహనాల రాకపోకలను పరిశీలించారు. రైల్వేస్టేషన్ నుంచి చుట్టుపక్కల ప్రాంతాలకు అందుబాటులో ఉన్న బస్సు సౌకర్యాల వివరాలను అధికారులను అడిగి తెలుసుకున్నారు.

స్టేషన్ మీదుగా రోజువారీగా రాకపోకలు సాగించే రైళ్ల సంఖ్య, ఉదయం–సాయంత్రం రద్దీ వేళల్లో రైళ్లు ఎక్కే, దిగే ప్రయాణికుల సంఖ్యపై సమాచారం సేకరించారు. ప్రయాణికుల రద్దీకి అనుగుణంగా ఆటోలు, బస్సులు, ప్రైవేటు వాహనాల నిలుపుదలను క్రమబద్ధీకరించి, స్టేషన్ ప్రవేశ మార్గాల్లో ట్రాఫిక్ నిలిచిపోకుండా చర్యలు చేపట్టాలని సూచించారు.

తర్వాత కేపీహెచ్‌బీ ట్రాఫిక్ పోలీస్ స్టేషన్ పరిధిలోని ప్రధాన ట్రాఫిక్ ప్రాంతాలను జేసీపీ సందర్శించారు. ప్రగతినగర్ యూ–టర్న్‌, రెమెడీ యూ–టర్న్‌ల వద్ద వాహనాల రాకపోకలు, రద్దీ సమయాల్లో ఏర్పడుతున్న ట్రాఫిక్ సమస్యలను స్వయంగా పరిశీలించారు.

రద్దీ ఎక్కువగా ఉండే వేళల్లో అవసరమైన సంఖ్యలో సిబ్బందిని మోహరించి, వాహనాలు నిలిచిపోకుండా ఎప్పటికప్పుడు చర్యలు తీసుకోవాలని ఆదేశించారు. ట్రాఫిక్ సమస్యలు తరచూ ఏర్పడే ప్రాంతాలను ముందుగానే గుర్తించి, రద్దీ తీవ్రమయ్యే వరకు వేచి చూడకుండా తక్షణ నియంత్రణ చర్యలు చేపట్టాలని స్పష్టం చేశారు.

వాహనదారులకు సాఫీగా, నిరంతరాయంగా ప్రయాణించే పరిస్థితులు కల్పించడంతోపాటు రోడ్డు ప్రమాదాల నివారణకు ప్రాధాన్యం ఇవ్వాలని జేసీపీ సూచించారు. ప్రధాన కూడళ్లు, యూ–టర్న్‌లు, నిర్మాణ పనులు కొనసాగుతున్న ప్రాంతాల్లో సిబ్బంది మరింత అప్రమత్తంగా వ్యవహరించాలని ఆదేశించారు.