- ప్రజలను బెదిరించి డబ్బులు వసూలు చేయొద్దని స్పష్టమైన హెచ్చరిక
- బహిరంగ ప్రదేశాల్లో అసభ్య ప్రవర్తనతో ఇబ్బందులు కలిగించవద్దని సూచన
- సమస్యలుంటే నేరుగా పోలీసుల దృష్టికి తీసుకురావాలని భరోసా
సామాన్యుడి అస్త్రం / మాధాపూర్:
ప్రజలను బెదిరించడం,దా ఒత్తిడి చేసి డబ్బులు వసూలు చేయడం వంటి చట్టవిరుద్ధ చర్యలకు పాల్పడితే కఠిన చర్యలు తప్పవని మాధాపూర్ పోలీసులు హెచ్చరించారు. మాధాపూర్ పోలీస్ స్టేషన్లో పలువురు ట్రాన్స్జెండర్ వ్యక్తులకు ఎస్హెచ్వో, సబ్ ఇన్స్పెక్టర్లు కౌన్సెలింగ్ నిర్వహించారు.
ఈ సందర్భంగా బహిరంగ ప్రదేశాలు, ప్రధాన రహదారులు, ట్రాఫిక్ కూడళ్లు, వాణిజ్య ప్రాంతాల్లో ప్రజలను బలవంతపెట్టి డబ్బులు అడగడం లేదా వసూలు చేయడం చట్టవిరుద్ధమని పోలీసులు స్పష్టం చేశారు. ప్రజలకు అసౌకర్యం కలిగించేలా అసభ్యంగా ప్రవర్తించడం, అభ్యంతరకర చర్యలకు పాల్పడటం సహించబోమని హెచ్చరించారు.
ప్రజల నుంచి ఫిర్యాదులు అందినా, పోలీసుల తనిఖీల్లో ఎవరైనా ఇటువంటి చర్యలకు పాల్పడుతున్నట్లు గుర్తించినా చట్టప్రకారం కేసులు నమోదు చేసి చర్యలు తీసుకుంటామని తెలిపారు. వ్యక్తుల ప్రవర్తన ఆధారంగానే చర్యలు ఉంటాయని, ఒక వర్గం మొత్తాన్ని లక్ష్యంగా చేసుకోవడం ఈ కౌన్సెలింగ్ ఉద్దేశం కాదని పోలీసులు స్పష్టం చేశారు.
ట్రాన్స్జెండర్ వ్యక్తులకు ఎలాంటి సమస్యలు ఎదురైనా చట్టాన్ని చేతుల్లోకి తీసుకోకుండా వెంటనే పోలీసుల దృష్టికి తీసుకురావాలని సూచించారు. వేధింపులు, వివక్ష, జీవనోపాధికి సంబంధించిన ఇబ్బందులు లేదా ఇతర సమస్యలపై పోలీస్ స్టేషన్ను సంప్రదిస్తే నిబంధనల ప్రకారం స్పందిస్తామని భరోసా ఇచ్చారు.
ప్రజల గౌరవానికి, భద్రతకు భంగం కలగకుండా ప్రతి ఒక్కరూ చట్టపరిధిలో వ్యవహరించాలని మాధాపూర్ పోలీసులు కోరారు. పరస్పర గౌరవంతో మెలగడం ద్వారా ప్రజలకు ఇబ్బందులు తలెత్తకుండా చూడాలని కౌన్సెలింగ్లో సూచించారు.
