ప్రజా గొంతుకు సంకెళ్లా?.. హనుమకొండలో హరీశ్ రావు అరెస్ట్

సామాన్యుడి అస్త్రం / హనుమకొండ: పాలిటెక్నిక్ విద్యార్థుల సమస్యలను తెలుసుకునేందుకు వచ్చిన మాజీ మంత్రి, బీఆర్ఎస్ శాసనసభాపక్ష ఉపనేత తన్నీరు హరీశ్ రావును పోలీసులు అరెస్ట్ చేయడంతో హనుమకొండ కలెక్టరేట్ వద్ద తీవ్ర ఉద్రిక్తత నెలకొంది. టీఎన్జీవో నాయకులు చేపట్టిన ధర్నాకు సంఘీభావం తెలిపిన అనంతరం పాలిటెక్నిక్ విద్యార్థులను కలిసేందుకు హరీశ్ రావు ప్రయత్నించగా పోలీసులు అడ్డుకున్నారు.

జీవో 97ను రద్దు చేయాలని, పాలిటెక్నిక్ కళాశాలలను స్కిల్స్ యూనివర్సిటీ పరిధిలోకి తీసుకెళ్లే నిర్ణయాన్ని వెనక్కి తీసుకోవాలని విద్యార్థులు ఆందోళన చేస్తున్నారు. వారికి మద్దతు తెలిపేందుకు హరీశ్ రావు హనుమకొండకు చేరుకున్నారు. ముందుగా ఆయన పర్యటనను అడ్డుకునేందుకు హైదరాబాద్‌లోని నివాసం వద్ద పోలీసులు ప్రయత్నించినప్పటికీ, అక్కడి నుంచి బయలుదేరి కలెక్టరేట్ వద్దకు చేరుకున్నట్లు సమాచారం. ఘటన వివరాలు⁠�

హరీశ్ రావు రాకతో బీఆర్ఎస్ నాయకులు, కార్యకర్తలు పెద్ద సంఖ్యలో కలెక్టరేట్‌కు చేరుకున్నారు. ఆయన విద్యార్థులతో మాట్లాడేందుకు ప్రయత్నించగా పోలీసులు అదుపులోకి తీసుకున్నారు. ఈ సందర్భంగా పోలీసులు, బీఆర్ఎస్ కార్యకర్తల మధ్య వాగ్వాదం, తోపులాట చోటుచేసుకోవడంతో పరిస్థితి ఉద్రిక్తంగా మారింది.

హరీశ్ రావును పోలీసు వాహనంలో తరలించకుండా కలెక్టరేట్ నుంచి సుబేదారి పోలీస్‌స్టేషన్ వరకు కాలినడకన తీసుకెళ్లారని బీఆర్ఎస్ నాయకులు ఆరోపించారు. మాజీ మంత్రి అనే కనీస గౌరవం కూడా ఇవ్వకుండా పోలీసులు దురుసుగా ప్రవర్తించారని మండిపడ్డారు. అయితే శాంతిభద్రతల పరిరక్షణలో భాగంగానే ఆయనను అదుపులోకి తీసుకున్నట్లు పోలీసు వర్గాలు పేర్కొంటున్నాయి.

ప్రజా సమస్యలపై పోరాడుతున్న ప్రతిపక్ష నాయకులను అరెస్టులతో అణచివేయాలని ప్రభుత్వం చూస్తోందని బీఆర్ఎస్ శ్రేణులు ఆగ్రహం వ్యక్తం చేశాయి. విద్యార్థులను కలవకుండా అడ్డుకోవడం ప్రజాస్వామ్యానికి విరుద్ధమంటూ ప్రభుత్వానికి, పోలీసులకు వ్యతిరేకంగా నినాదాలు చేశాయి. ఉద్రిక్త పరిస్థితుల నేపథ్యంలో కలెక్టరేట్, సుబేదారి పోలీస్‌స్టేషన్ పరిసరాల్లో పోలీసులు భారీ బందోబస్తు ఏర్పాటు చేశారు.