పాలు పెంచే పేరుతో ‘విషపు దందా’.. చందానగర్‌లో 40 లీటర్ల ఆక్సిటోసిన్ సీజ్!

సామాన్యుడి అస్త్రం / చందానగర్:

పశువుల నుంచి అధికంగా పాలు పితికేందుకు ఆక్సిటోసిన్‌ ఇంజెక్షన్లను అక్రమంగా విక్రయిస్తున్న దందాను సైబరాబాద్‌ స్పెషల్‌ ఆపరేషన్‌ టీమ్‌ పోలీసులు బట్టబయలు చేశారు. చందానగర్‌లోని తారానగర్‌ మార్కెట్‌ సమీపంలో ఉన్న ‘సంతోష్‌ మెడికల్స్‌’పై మెరుపుదాడి నిర్వహించి భారీగా ఆక్సిటోసిన్‌ సీసాలను స్వాధీనం చేసుకున్నారు.

మెడికల్‌ షాప్‌ మాటున నిషేధిత ఇంజెక్షన్ల విక్రయం సాగుతున్నట్లు అందిన పక్కా సమాచారంతో SOT పోలీసులు రంగంలోకి దిగారు. చందానగర్‌ పోలీసులతో కలిసి దుకాణంలో తనిఖీలు నిర్వహించగా, 200 మిల్లీలీటర్ల సామర్థ్యం కలిగిన 200 ఆక్సిటోసిన్‌ బాటిళ్లు బయటపడినట్లు అధికారులు వెల్లడించారు. స్వాధీనం చేసుకున్న ద్రావణం మొత్తం పరిమాణం 40 లీటర్లు ఉంటుందని పేర్కొన్నారు.

పశువుల నుంచి అసహజంగా ఎక్కువ పాలు పొందేందుకు ఈ ఇంజెక్షన్లను వినియోగిస్తున్నట్లు పోలీసులు అనుమానిస్తున్నారు. ఆక్సిటోసిన్‌ను అనుమతులు లేకుండా నిల్వ చేయడం, విక్రయించడం పశువుల ఆరోగ్యంతోపాటు ప్రజారోగ్యానికీ ప్రమాదకరమని అధికారులు హెచ్చరించారు.

ఈ దందాతో సంబంధం ఉన్న మెడికల్‌ షాప్‌ నిర్వాహకుడిని పోలీసులు అదుపులోకి తీసుకున్నారు. డ్రగ్‌ ఇన్‌స్పెక్టర్‌ సమక్షంలో పంచనామా నిర్వహించి, ఆక్సిటోసిన్‌ సీసాలను సీజ్‌ చేశారు. ఔషధాలు–సౌందర్య సాధనాల చట్టం, భారతీయ న్యాయ సంహితలోని వర్తించే సెక్షన్ల కింద చందానగర్‌ పోలీసులు కేసు నమోదు చేసినట్లు సమాచారం.

స్వాధీనం చేసుకున్న ఆక్సిటోసిన్‌ను ఎక్కడి నుంచి తీసుకొచ్చారు? ఎంతకాలంగా విక్రయిస్తున్నారు? ఎవరెవరికి సరఫరా చేశారు? ఈ అక్రమ రవాణా వెనుక మరెవరైనా ఉన్నారా? అనే కోణాల్లో దర్యాప్తు కొనసాగుతోంది.

అనుమతులు లేకుండా ప్రమాదకరమైన మందులు, ఇంజెక్షన్లను నిల్వ చేసినా, విక్రయించినా కఠిన చర్యలు తప్పవని SOT అధికారులు హెచ్చరించారు. ప్రజలకు ఇటువంటి అక్రమ విక్రయాల గురించి సమాచారం ఉంటే వెంటనే పోలీసులకు లేదా ఔషధ నియంత్రణ అధికారులకు తెలియజేయాలని సూచించారు.