- చందనగర్ పీజేఆర్ స్టేడియం వద్ద ఇద్దరి పట్టివేత
- కార్టన్ బాక్స్లో 227 స్టెరాయిడ్ ఇంజక్షన్ బాటిళ్లు
- జిమ్లకు సరఫరా చేశారా?.. మూలాలపై పోలీసుల ఆరా
సామాన్యుడి అస్త్రం / శేరిలింగంపల్లి : శరీరాన్ని వేగంగా పెంచుకోవాలనే యువత ఆసక్తిని అక్రమార్కులు సొమ్ము చేసుకుంటున్నారు. వైద్యుల పర్యవేక్షణ లేకుండా వినియోగిస్తే ఆరోగ్యానికి ప్రమాదకరంగా మారే స్టెరాయిడ్ ఇంజక్షన్లను రహస్యంగా విక్రయిస్తున్న వ్యవహారాన్ని చందనగర్ పోలీసులు బయటపెట్టారు. ఇద్దరిని అదుపులోకి తీసుకొని వారి వద్ద నుంచి 227 స్టెరాయిడ్ ఇంజక్షన్ బాటిళ్లను స్వాధీనం చేసుకున్నారు.
చందనగర్ పోలీస్ ఇన్స్పెక్టర్ శ్రీధర్కుమార్ తెలిపిన వివరాల ప్రకారం.. చందనగర్లోని పీజేఆర్ స్టేడియం వద్ద అక్రమంగా స్టెరాయిడ్ ఇంజక్షన్లు విక్రయిస్తున్నట్లు పోలీసులకు సమాచారం అందింది. దీంతో అక్కడికి చేరుకున్న పోలీసులు అనుమానాస్పదంగా సంచరిస్తున్న ఇద్దరిని అదుపులోకి తీసుకొని తనిఖీ చేశారు.
వారి వద్ద ఉన్న కార్టన్ బాక్స్ను పరిశీలించగా, అందులో 10 మిల్లీలీటర్ల సామర్థ్యం కలిగిన 227 స్టెరాయిడ్ ఇంజక్షన్ బాటిళ్లు బయటపడ్డాయి. వాటిని స్వాధీనం చేసుకున్న పోలీసులు, పట్టుబడిన ఇద్దరినీ విచారించారు. స్వాధీనం చేసుకున్న ఇంజక్షన్ల మొత్తం విలువ సుమారు రూ.96,475 ఉంటుందని అంచనా వేశారు.
పోలీసుల వివరాల ప్రకారం పట్టుబడిన వారిని సారా సాయిరాం (39), కుంచాల రవీందర్ (25)గా గుర్తించారు. సాయిరాం మెడికల్ రిప్రజెంటేటివ్గా, రవీందర్ జిమ్ ట్రైనర్గా పనిచేస్తున్నట్లు పోలీసులు తెలిపారు. హిమాచల్ప్రదేశ్ నుంచి స్టెరాయిడ్ ఇంజక్షన్లను తీసుకొచ్చి హైదరాబాద్లో విక్రయిస్తున్నట్లు ప్రాథమిక విచారణలో గుర్తించినట్లు వెల్లడించారు.
ఒక్కో ఇంజక్షన్ను సుమారు రూ.37కు కొనుగోలు చేసి రూ.425 వరకు విక్రయిస్తున్నట్లు పోలీసుల విచారణలో తేలినట్లు సమాచారం. అంటే కొనుగోలు ధరకు పదింతలకు పైగా ధర నిర్ణయించి యువతకు అంటగడుతున్నారన్న ఆరోపణలు వినిపిస్తున్నాయి. జిమ్లో వ్యాయామం చేస్తున్నవారు, త్వరగా కండలు పెంచుకోవాలని భావిస్తున్న యువకులను ప్రధానంగా లక్ష్యంగా చేసుకున్నట్లు పోలీసులు అనుమానిస్తున్నారు.
జిమ్ ట్రైనర్గా పనిచేస్తున్న రవీందర్ తన పరిచయంలోని కస్టమర్లకు ఈ ఇంజక్షన్లను విక్రయించాడా? ఇతర జిమ్లకు కూడా సరఫరా చేశాడా? ఇప్పటివరకు ఎంతమందికి వీటిని అందించారు? అనే అంశాలపై పోలీసులు దర్యాప్తు చేస్తున్నారు. ఈ వ్యవహారం ఇద్దరితోనే పరిమితమైందా లేక దీని వెనుక పెద్ద సరఫరా నెట్వర్క్ ఉందా అనే కోణంలోనూ ఆరా తీస్తున్నారు.
హిమాచల్ప్రదేశ్లో ఈ ఇంజక్షన్లను ఎవరి వద్ద కొనుగోలు చేశారు? హైదరాబాద్కు ఏ మార్గంలో తరలించారు? నగరంలోని మెడికల్ దుకాణాలు లేదా జిమ్ నిర్వాహకులతో సంబంధాలు ఉన్నాయా? అనే ప్రశ్నలకు సమాధానాలు రావాల్సి ఉంది. సరఫరాదారులను గుర్తిస్తేనే అక్రమ స్టెరాయిడ్ దందా మూలాలు బయటపడే అవకాశం ఉంది.
వైద్యుల సూచనలు, అవసరమైన పరీక్షలు లేకుండా స్టెరాయిడ్లను వినియోగించడం ఆరోగ్యంపై తీవ్ర ప్రభావం చూపే ప్రమాదం ఉందని నిపుణులు హెచ్చరిస్తున్నారు. కొద్దికాలంలో శరీరాకృతిని మార్చుకోవాలనే ఆతృతతో గుర్తుతెలియని వ్యక్తుల నుంచి ఇంజక్షన్లు కొనుగోలు చేయవద్దని సూచిస్తున్నారు.
ఈ ఘటనతో శేరిలింగంపల్లి పరిధిలోని జిమ్లు, ఫిట్నెస్ కేంద్రాల్లో జరుగుతున్న ఔషధ విక్రయాలపై పర్యవేక్షణ ఎంతవరకు ఉందన్న ప్రశ్న తలెత్తుతోంది. పోలీసులు, డ్రగ్ కంట్రోల్ అధికారులు సంయుక్తంగా తనిఖీలు నిర్వహించి అక్రమ స్టెరాయిడ్ విక్రయాలకు అడ్డుకట్ట వేయాల్సిన అవసరం కనిపిస్తోంది.
