ఒడిశా నుంచి గంజాయి దందా.. రెండు కేసుల్లో 2.815 కేజీలు పట్టివేత!

సామాన్యుడి అస్త్రం / మాదాపూర్‌ :

ఒడిశా ప్రాంతం నుంచి హైదరాబాద్‌కు అక్రమంగా తరలించిన గంజాయిని ఎక్సైజ్‌ అధికారులు పట్టుకున్నారు. మాదాపూర్‌ ఎక్సైజ్‌ స్టేషన్‌ పరిధిలో నిర్వహించిన తనిఖీల్లో 2.545 కేజీల గంజాయి బయటపడింది. పక్కా సమాచారంతో నిఘా పెట్టిన అధికారులు గంజాయిని స్వాధీనం చేసుకుని కేసు నమోదు చేశారు.

మరోవైపు, కుత్బుల్లాపూర్‌ డీడీఎఫ్‌ అధికారులు చేపట్టిన తనిఖీల్లో మరో 270 గ్రాముల గంజాయి పట్టుబడింది. రెండు కేసుల్లో కలిపి మొత్తం 2.815 కేజీల గంజాయిని స్వాధీనం చేసుకున్నట్లు ఎక్సైజ్‌ వర్గాల సమాచారం.

ఈ కేసులకు సంబంధించి ప్రదీప్‌ గూగల్‌, షరీఫుల్‌ అనే ఇద్దరిని అధికారులు అదుపులోకి తీసుకున్నారు. అనంతరం వారిని తదుపరి విచారణ కోసం కుత్బుల్లాపూర్‌ ఎక్సైజ్‌ స్టేషన్‌లో అప్పగించారు. గంజాయి ఎక్కడి నుంచి తీసుకొచ్చారు, నగరంలో ఎవరికి సరఫరా చేయాలని భావించారు, దీని వెనుక మరెవరైనా ఉన్నారా అనే కోణాల్లో అధికారులు విచారణ కొనసాగిస్తున్నారు.

బయటి రాష్ట్రాల నుంచి నగరానికి మాదకద్రవ్యాలు చేరుతున్న నేపథ్యంలో రవాణా మార్గాలు, అనుమానిత వ్యక్తుల కదలికలపై నిఘాను మరింత కట్టుదిట్టం చేసినట్లు ఎక్సైజ్‌ అధికారులు తెలిపారు.