• సైబరాబాద్‌లో శుద్ధి చేసిన మురుగునీటి సరఫరాకు శ్రీకారం
• పార్కులు, గార్డెనింగ్, ల్యాండ్‌స్కేపింగ్‌కు ప్రత్యేక ట్యాంకర్లు
• 155313కు ఫోన్ చేస్తే గ్రీన్ ట్యాంకర్ బుకింగ్ సదుపాయం
సామాన్యుడి అస్త్రం / సైబరాబాద్ బ్యూరో : ఓవైపు తాగునీటి అవసరాలు పెరుగుతున్నాయి.. మరోవైపు పార్కుల్లో మొక్కల పెంపకం, పచ్చదనం నిర్వహణకు పెద్ద మొత్తంలో నీరు అవసరమవుతోంది. ఇలాంటి పరిస్థితుల్లో విలువైన మంచినీటిని పొదుపు చేస్తూ, మురుగునీటిని శుద్ధి చేసి తిరిగి వినియోగించే దిశగా సైబరాబాద్ మున్సిపల్ కార్పొరేషన్ (సీఎంసీ) కీలక అడుగు వేసింది. ఇకపై తోటలకు, పార్కులకు శుద్ధి చేసిన నీటిని ట్యాంకర్ల ద్వారా అందించేలా ప్రత్యేకంగా 'గ్రీన్ ట్యాంకర్' సేవలను అందుబాటులోకి తీసుకొచ్చింది. ఆదివారం ముల్లకత్వ మురుగునీటి శుద్ధి కేంద్రం (ఎస్టీపీ) వద్ద సీఎంసీ కమిషనర్ ఈ సేవలను ప్రారంభించారు.
తాగునీటిని కాపాడేందుకే కొత్త ప్రయత్నం!
ఇళ్లలో అవసరాలకు వాడే మంచినీటినే చాలాచోట్ల మొక్కలకు, పచ్చిక బయళ్లకు, ఇతర నిర్వహణ పనులకు వినియోగిస్తున్నారు. దీంతో తాగునీటి వనరులపై అదనపు భారం పడుతోంది. ఈ పరిస్థితిని మార్చాలన్న ఉద్దేశంతో హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (హెచ్‌ఎండబ్ల్యూఎస్‌ఎస్‌బీ), అర్బన్ బయోడైవర్సిటీ (యూబీడీ) విభాగాల సమన్వయంతో సీఎంసీ ఈ కార్యక్రమానికి శ్రీకారం చుట్టింది. ఎస్టీపీల్లో శుద్ధి చేసిన మురుగునీటిని వృథా కాకుండా పచ్చదనం పెంపకానికి ఉపయోగించడం దీని ప్రధాన లక్ష్యం.
ఒక్క ఫోన్ కాల్‌తో ట్యాంకర్ బుకింగ్
గ్రీన్ ట్యాంకర్ సేవలను వినియోగించుకోవాలనుకునే ప్రజలు, కాలనీ సంక్షేమ సంఘాలు, విద్యాసంస్థలు, వాణిజ్య సంస్థలు ప్రత్యేక హెల్ప్‌లైన్ నంబర్ 155313ను సంప్రదించవచ్చు. తమ అవసరాలకు అనుగుణంగా శుద్ధి చేసిన నీటి కోసం ట్యాంకర్‌ను బుక్ చేసుకునే అవకాశం కల్పించారు. ప్రధానంగా పార్కులు, గార్డెనింగ్, ల్యాండ్‌స్కేపింగ్‌తోపాటు అనుమతించిన ఇతర తాగునీటేతర అవసరాలకు ఈ నీటిని వినియోగించుకోవచ్చు. అయితే ఈ నీరు తాగడానికి ఉద్దేశించినది కాదన్న విషయాన్ని వినియోగదారులు గుర్తుంచుకోవాలి.
పచ్చదనంతోపాటు నీటి పొదుపు
నగరం విస్తరిస్తున్న కొద్దీ నీటి అవసరాలు కూడా పెరుగుతున్నాయి. వర్షాలు సమృద్ధిగా కురిస్తే ఒక సమస్య.. వర్షపాతం తగ్గితే మరో సమస్య. ఎల్‌నినో వంటి వాతావరణ పరిస్థితుల కారణంగా వర్షపాతంలో మార్పులు చోటుచేసుకునే అవకాశమున్న నేపథ్యంలో ఇప్పటి నుంచే నీటి సంరక్షణపై దృష్టి పెట్టాల్సిన అవసరాన్ని సీఎంసీ గుర్తుచేసింది.
ఈ సందర్భంగా కమిషనర్ మాట్లాడుతూ కాలనీ సంక్షేమ సంఘాలు, విద్యాసంస్థలు, వ్యాపార సంస్థలు పచ్చదనం నిర్వహణకు శుద్ధి చేసిన నీటిని ఉపయోగించేందుకు ముందుకు రావాలని కోరారు. తోటల పెంపకం, నిర్మాణ పనులు వంటి అనుమతించిన అవసరాలకు మంచినీటికి బదులుగా శుద్ధి చేసిన నీటిని వినియోగించాలని సూచించారు. నీటి పొదుపును ప్రతి ఒక్కరూ సామాజిక బాధ్యతగా భావించాలని విజ్ఞప్తి చేశారు.
మంచి ప్రయత్నం.. ప్రజలకు ఎంత చేరువవుతుందో?
నీటి సంరక్షణకు గ్రీన్ ట్యాంకర్ల ప్రారంభం మంచి ముందడుగే. అయితే ఈ సేవలు కాలనీలకు ఎంత సులభంగా అందుతాయి? ట్యాంకర్ ఛార్జీలు ఎలా ఉంటాయి? బుకింగ్ చేసిన తర్వాత ఎంత సమయంలో నీరు సరఫరా చేస్తారు? అనే అంశాలపై ప్రజలకు స్పష్టమైన సమాచారం అందించాల్సి ఉంది. ముఖ్యంగా వేసవిలో పార్కుల నిర్వహణకు ఇబ్బందులు ఎదుర్కొనే కాలనీ సంఘాలకు ఈ సేవలు ఉపయోగపడే అవకాశముంది.
మురుగునీటిని శుద్ధి చేయడమే కాదు.. తిరిగి ఉపయోగించగలిగితేనే నీటి సంరక్షణ లక్ష్యం నెరవేరుతుంది. ఆ దిశగా సీఎంసీ ప్రారంభించిన గ్రీన్ ట్యాంకర్ కార్యక్రమం ఎంతవరకు ప్రజల్లోకి వెళ్తుందన్నది రాబోయే రోజుల్లో తేలనుంది.
