మందుల దుకాణం ముసుగులో ‘మత్తు’ వ్యాపారం?

సామాన్యుడి అస్త్రం / మియాపూర్‌:

జబ్బును తగ్గించాల్సిన మందుల దుకాణమే మత్తుకు అడ్డాగా మారిందా? వైద్యుల ప్రిస్క్రిప్షన్‌ లేకుండానే అలవాటు కలిగించే మందులను యువతకు చేరవేస్తున్నారా? మియాపూర్‌లోని బాలాజీ మెడికల్స్‌పై సైబరాబాద్‌ ఎస్‌ఓటీ, స్థానిక పోలీసులు నిర్వహించిన దాడుల్లో వెలుగుచూసిన అంశాలు ఇప్పుడు తీవ్ర కలకలం రేపుతున్నాయి.

పోలీసులు వెల్లడించిన వివరాల ప్రకారం.. బాలాజీ మెడికల్స్‌లో వైద్యుల ప్రిస్క్రిప్షన్‌ లేకుండానే మత్తు ప్రభావం కలిగించే మాత్రలు, సిరప్‌లు, ఇంజెక్షన్లు విక్రయిస్తున్నట్లు సమాచారం అందింది. దీంతో ఎస్‌ఓటీ, మియాపూర్‌ పోలీసులు సంయుక్తంగా ఫార్మసీపై ఆకస్మిక దాడి చేశారు.

తనిఖీల్లో ట్యాపెంటడాల్‌ మాత్రలు సహా సుమారు 1,500 టాబ్లెట్లు, 60 బాక్సుల్లో నిల్వ ఉంచిన వివిధ మందులు, కొన్ని ఇంజెక్షన్లను అధికారులు స్వాధీనం చేసుకున్నట్లు సమాచారం. మందుల కొనుగోలు, నిల్వ, విక్రయాలకు సంబంధించిన రికార్డులు, బిల్లులు, వైద్యుల ప్రిస్క్రిప్షన్లను పోలీసులు పరిశీలిస్తున్నారు.

ఇంటికే మత్తు మందుల సరఫరా?

ఈ వ్యవహారంలో అత్యంత ఆందోళన కలిగిస్తున్న అంశం హోమ్‌ డెలివరీ నెట్‌వర్క్‌. వినియోగదారులకు మందులను నేరుగా చేరవేసేందుకు ప్రత్యేకంగా డెలివరీ బాయ్స్‌ను ఏర్పాటు చేసుకున్నట్లు పోలీసులు అనుమానిస్తున్నారు. ఈ నేపథ్యంలో ఆరుగురు డెలివరీ బాయ్స్‌ను అదుపులోకి తీసుకుని విచారిస్తున్నట్లు తెలుస్తోంది.

ఫార్మసీ నిర్వాహకుడు మహేశ్వర్‌రెడ్డిని పోలీసులు అదుపులోకి తీసుకున్నారు. అయితే ఎవరెవరికి మందులు సరఫరా చేశారు? వైద్యుల ప్రిస్క్రిప్షన్లు లేకుండానే ఎంతకాలంగా విక్రయాలు సాగుతున్నాయి? ఈ మందులను ఎక్కడి నుంచి తెప్పించారు? దీని వెనుక మరెవరైనా ఉన్నారా? అనే కోణాల్లో దర్యాప్తు కొనసాగుతోంది.

మందే మత్తుగా మారితే…

ట్యాపెంటడాల్‌ వంటి మందులను సాధారణంగా తీవ్రమైన నొప్పి నివారణకు వైద్యుల పర్యవేక్షణలో ఉపయోగిస్తారు. వాటిని ఇష్టానుసారంగా వాడితే అలవాటుగా మారే ప్రమాదం ఉంటుంది. ఇలాంటి మందులు ప్రిస్క్రిప్షన్‌ లేకుండా బహిరంగంగా అందుబాటులోకి వస్తే యువత మత్తుకు బానిసయ్యే ముప్పు ఉందని వైద్య నిపుణులు హెచ్చరిస్తున్నారు.

ఒక మెడికల్‌ షాపుపై దాడితోనే ఈ వ్యవహారం ముగిసిపోకూడదు. స్వాధీనం చేసుకున్న మందుల అసలు సరఫరాదారులు, కొనుగోలుదారులు, ఆన్‌లైన్‌ లేదా ఫోన్‌ ద్వారా జరిగిన ఆర్డర్లు, ఆర్థిక లావాదేవీలను పూర్తిస్థాయిలో పరిశీలించాల్సిన అవసరం ఉంది. అలాగే డ్రగ్‌ కంట్రోల్‌ అధికారుల పర్యవేక్షణలో ఇలాంటి విక్రయాలు ఎలా కొనసాగాయన్న ప్రశ్నకూ సమాధానం రావాలి.