- మల్లంపేట్ ఓఆర్ఆర్ ఎగ్జిట్–4ఏ సమీపంలో చిక్కుకున్న లారీ
- కిలోమీటర్ల మేర నిలిచిపోయిన వాహనాలు.. ప్రయాణికుల అవస్థలు
- భారీ వాహనాల నియంత్రణకు శాశ్వత ప్రణాళిక ఎక్కడని ప్రశ్న
సామాన్యుడి అస్త్రం / బాచుపల్లి : బాచుపల్లి–మల్లంపేట్ రోడ్డుపై భారీ వాహనం చిక్కుకోవడంతో ప్రయాణికులు మరోసారి ట్రాఫిక్ నరకాన్ని చూశారు. మల్లంపేట్ మసీదు, ఓఆర్ఆర్ ఎగ్జిట్–4ఏ సమీపంలో లారీ రోడ్డుకు అడ్డంగా నిలిచిపోవడంతో వాహనాల రాకపోకలు తీవ్రంగా దెబ్బతిన్నాయి.
స్థానికంగా అందిన సమాచారం ప్రకారం గురువారం ఉదయం జరిగిన ఈ ఘటనతో బాచుపల్లి నుంచి మల్లంపేట్, బౌరంపేట్, గండిమైసమ్మ వైపు వెళ్లే మార్గంలో వాహనాలు పెద్ద సంఖ్యలో నిలిచిపోయాయి. కార్యాలయాలకు వెళ్లే ఉద్యోగులు, పాఠశాల బస్సులు, ద్విచక్ర వాహనదారులు తీవ్ర ఇబ్బందులు ఎదుర్కొన్నారు. ఇరుకైన మార్గంలో ఒక భారీ వాహనం నిలిచిపోతే దాన్ని దాటేందుకు ప్రత్యామ్నాయ మార్గం లేకపోవడం సమస్యను మరింత పెంచింది.
బాచుపల్లి ఫ్లైఓవర్ అందుబాటులోకి వచ్చిన తర్వాత ప్రధాన కూడలి వద్ద కొంత ఉపశమనం కలిగినా, మల్లంపేట్–ఓఆర్ఆర్ మార్గంలో పరిస్థితి మాత్రం మారలేదని ప్రయాణికులు చెబుతున్నారు. రోడ్డు సామర్థ్యానికి మించి భారీ వాహనాలు, నిర్మాణ సామగ్రి లారీలు తిరుగుతుండడంతో నిత్యం ట్రాఫిక్ సమస్యలు ఎదురవుతున్నాయని వాపోతున్నారు.
భారీ వాహనాలు నిలిచిపోయినప్పుడు వాటిని వెంటనే తొలగించేందుకు రికవరీ వాహనం అందుబాటులో లేకపోవడం, ట్రాఫిక్ సిబ్బంది తగిన సంఖ్యలో లేకపోవడంపై ప్రశ్నలు వ్యక్తమవుతున్నాయి. పీక్ అవర్స్లో భారీ వాహనాల రాకపోకలను నియంత్రించడంతోపాటు, మల్లంపేట్ రోడ్డును విస్తరించాలని స్థానికులు కోరుతున్నారు.
ఫ్లైఓవర్ నిర్మించామనే ప్రచారంతో సరిపెట్టకుండా, దానికి అనుసంధానంగా ఉన్న రోడ్లలోని బాటిల్నెక్లను తొలగించాలి. లేదంటే కోట్ల రూపాయలతో నిర్మించిన ఫ్లైఓవర్ ప్రయోజనం ట్రాఫిక్ జామ్లోనే చిక్కుకుపోతుందని ప్రజలు హెచ్చరిస్తున్నారు.
